នាថ្ងៃទី ១០ ខែ វិច្ឆិកា ឆ្នាំ ២០២២ នៅខេត្តសៀមរាប, ក្រសួងសេដ្ឋកិច្ច និងហិរញ្ញវត្ថុ បានរៀបចំវិបស្សនាស្តីពីការត្រួតពិនិត្យលើបញ្ហាប្រឈម វឌ្ឍនភាព និង លទ្ធផល នៃការអនុវត្តគម្រោង FMIS សម្រាប់ឆ្នាំ ២០២២ និង ទិសដៅបន្តសម្រាប់ឆ្នាំ ២០២៣ ។

អង្គវិបស្សនានេះ ដឹកនាំដោយឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋមន្រ្តីប្រតិភូអមនាយករដ្ឋមន្ត្រី រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និង ជាប្រធានក្រុមការងារគ្រប់គ្រងគម្រោង FMIS ដោយមានការចូលរួមពីឯកឧត្តមអនុប្រធានប្រចាំការ, ឯកឧត្តមប្រធានលេខាធិការដ្ឋាន ព្រមទាំងថ្នាក់ដឹកនាំ និង មន្រ្តីនៃលេខាធិការដ្ឋានក្រុមការងារគ្រប់គ្រងគម្រោង FMIS ។

អង្គវិបស្សនា បានពិនិត្យពិភាក្សាលើវឌ្ឍនភាព នៃការអនុវត្តគម្រោង FMIS សម្រាប់ ឆ្នាំ ២០២២ និង ទិសដៅបន្តសម្រាប់ឆ្នាំ ២០២៣ ។ ទន្ទឹមនេះ អង្គវិបស្សនា បានពិភាក្សាយ៉ាងផុលផុសលើបញ្ហាប្រឈមនានា ដែលក្រុមការងារគ្រប់គ្រងគម្រោង FMIS បានជួបប្រទះក្នុងដំណើរការអនុវត្តការងារ ព្រមទាំងដំណោះស្រាយពាក់ព័ន្ធ ។ គួរបញ្ជាក់ផងដែរថា ក្រុមការងារគ្រប់គ្រងគម្រោង FMIS សម្រេចបាននូវវឌ្ឍនភាពសំខាន់ៗជាច្រើន ក្នុងឆ្នាំ ២០២២ នេះ ដែលរួមមាន ការពង្រីកការអនុវត្តគម្រោង FMIS ទៅដល់ការដ្ឋានថ្មីនៅអង្គភាពថវិកាអាណាប័កផ្ទេរសិទ្ធិពេញលេញចំនួន ១០, ការដាក់ឱ្យអនុវត្តមុខងាររៀបចំផែនការថវិកានៅក្រសួង-ស្ថាប័ន ចំនួន ១១ ថ្មី និង មុខងារលទ្ធកម្មពេញលេញនៅគ្រប់ក្រសួង-ស្ថាប័ន, ការធ្វើសន្ធានកម្មទិន្នន័យរវាងប្រព័ន្ធ FMIS និង ប្រព័ន្ធ ASYCUDA ដោយមិនប្រើប្រាស់ក្រដាសខាងក្រៅ, ការរៀបចំដាក់ឱ្យអនុវត្តគម្រោង FMIS ដល់គ្រឹះស្ថានសាធារណៈរដ្ឋបាល ដែលរួមមានការបញ្រ្ជាបការយល់ដឹង ការបណ្តុះបណ្តាល ការតភ្ជាប់ហេដ្ឋារចនាសម្ព័ន្ធ និង ការអភិវឌ្ឍប្រព័ន្ធ FMIS, ការពង្រឹងការអនុវត្តគម្រោង FMIS ពិសេសលើការកែសម្រួលនីតិវិធីអនុវត្តការងារតាមប្រព័ន្ធ FMIS ទាំងស្រុងលើនីតិវិធីចំណាយថវិកាចរន្តទៅកាន់ក្រសួងសេដ្ឋកិច្ច និងហិរញ្ញវត្ថុ និង ក្រសួងបរិស្ថាន, និង ការពង្រឹងការប្រើប្រាស់របាយការណ៍ក្នុងប្រព័ន្ធ FMIS ។

ឯកឧត្តមបណ្ឌិតសភាចារ្យ បានវាយតម្លៃខ្ពស់ ចំពោះការខិតខំប្រឹងប្រែងរបស់លេខាធិការដ្ឋានក្រុមការងារគ្រប់គ្រងគម្រោង FMIS ដែលបានបំពេញការងារ ប្រកបដោយស្មារតីបុរេសកម្ម និង ការទទួលខុសត្រូវខ្ពស់ ។ ទន្ទឹមនេះ ឯកឧត្តមបណ្ឌិតសភាចារ្យ បានលើកទឹកចិត្តដល់ក្រុមការងារឱ្យបន្តបំពេញការងារឱ្យកាន់តែសកម្មថែមទៀត ពិសេសការងារគាំទ្រដល់គ្រប់ការដ្ឋាន និង អ្នកប្រើប្រាស់ប្រព័ន្ធ FMIS។